自行試菜☆逸東

逸東唔包試菜, 真係有D灰灰地, 少左個雙方家長見面既機會, 又要自已出去搵地方喇

之前買左團購,同朋友肥仔AMY一齊去食逸東BUFFET, 睇下個環境同食物質數, 但其實都無嘜關係,因為我地係2樓同埋食中菜,哈哈~~
今次黎當俾個籍口自己放肆下, 因為有生蠔任食, 鵝肝任食同埋白酒任飲, 所以先買咋, 唔係都唔SHOW佢

生蠔 ☆☆☆☆(五粒星滿分) 雖然得一款,但都幾新鮮, 起碼我無肚痛


龍蝦仔☆☆☆☆☆ 依個係我暫時黎講唯一一間唔會超喊既龍蝦仔, 我都不停食呀


鵝肝黎喇☆☆☆☆☆ 同我去MR. STEAK一樣, 食左半打呀, 又有黑 醋點下, 成餐即刻貴哂


服務☆☆☆☆ 都OK,有禮貌, 但有轉白酒叫左兩次都無黎羅, 要惡少少先即刻攞黎
環境☆☆☆☆ 好浪漫FEEL
白酒☆☆☆ 唔好飲, 但我都要飲佢3杯
辣螺☆☆☆☆☆ 超級好味
刺身☆☆☆ 完全唔得, 食左一轉無再食, 但無肚痛
煙三文魚☆☆☆☆☆ 有質數,好好味
焗鵝肝梳乎厘☆☆☆☆☆ 食一口就無, 同佢味道係正既,我都食左3杯
甜品☆☆☆☆ 都OK既, 賣相麻麻, 但又好味喎

整體☆☆☆☆
不能滿分原因係佢超少野食羅, 可能鵝肝,生蠔同白酒太貴, 其他成本要低D, 如果唔係, 我下次一定會再黎架
3.5小時任食都好好架喇, 唔洗趕住趕住咁,後尾仲坐多半個鐘先趕我地走

台北婚照之旅 DAY 6 - 酒店早餐 + 西門町 + 高鐵 + 機場

honey本身唔想食早餐架, 又話好早起身好眼睏, 但我點會放過係溫泉旅店食早餐既機會, 好enjoy架麻, 但最終要honey叫我先識醒, 咁就雞咁腳飛去食, 估唔到, 都多人喎, 琴晚九點幾黎到依個, 一個客人都見唔到, 仲以為依間野無人幫襯添, 原來唔係

雖然唔係好多款擇, 但味道都ok既, 我仲食左我至愛既粟米片添


仲有得玩, 自制左依份, 但似終都係honey幫我拎佢出黎, 我真係幾識扮野


食完早餐, 就返房浸多次溫泉, 真舒服, check out時有旅店職員車番我地去新北投站, 落左少少雨, 繼續我地last day既行程


黎到台北車站, 先寄存行李, 買左去機場既高鐵車票先, 原先係諗住搭巴士, 頂!!! 搵左成個鐘都未搵到邊到買巴士d飛, 激死, 結果都係搭高鐵算


黎到最後一站-西門町, 成個下午都係依度架喇, 食食食, 買買買


條街唔係咁多人


今日可以盡情食熱氣野, 首先食依個繼光香香雞


好好味喎


黎到滷天祿, 買左鴨舌拎返香港, 同即場食左依串心, 好大粒


香港以前都有, 唔知執哂未呢, 好想上去食, 但honey又唔食, 佢話係香港食過, 想食其他野


跟住睇住google map搵野食, 黎到可樂餅, 等左好耐, 超熱


係隔離買左依杯


見好多人排隊買, 我又買埋一份, 等左好耐先到我咋, 係薯仔黎, 上面再加配料, 加汁, 估佢唔到咁好味, honey唔多開頭唔多討好, 但食第一口, 跟住好快食左一半


個胃仲有大擺位, 哈哈, 黎到至出名既"阿宗都線", 又係超好味, 我地叫左一碗兩份, 我係度食, honey係咁望住我, 流哂口水


堅好味, 以前食唔覺佢咁好味既, 勁想食多一碗, 但仲有好..好多野未試


地標


依間野真係.. 我特登搵依間野黎食, 超搵苯, 一杯肉鬆雪糕(一球) 收我NT$150, 本身我想食豬腳, 職員話我地唔太接受到, 叫我地食肉鬆, 早知唔聽佢講食番豬腳啦


依舊野四條野港紙, 零特別!!! 雪糕(少甜)+肉鬆(咸), that all


鴨肉扁 NT$200 份量


夠鐘要走了, honey搵左一陣行李都搵唔到寄存左係邊, 睇黎都要靠我依個聰明的老婆仔了
搵左一陣就搵到啦~ 絕招: 問人


搭高鐵要轉接駁巴士先到的, 所以之前先話搭巴士直接去機場, 點知搵極都搵唔到, 都快既, 一個鐘左右就到機場lu, 係機場執好剛買的手信, 全部寄哂倉, 輕輕鬆鬆上機lu


飛機餐, 都ok好味呀, 我食哂添


都睇唔哂依套戲就到家了


再見了, 台北, 下次唔順路都唔會再黎喇, 之前黎左兩次喇, 仲黎, 仲有好多地方未去過架><

總結: 今次6日5夜真係好正, 好好玩, 食左好多好好味既野, 去左好多好好玩既地方, 又探到朋友, 過程都算順順利利, 同天公日日造美, 原來台北都可以好好玩, 唔似之前兩次咁悶(可能今次我plan得好,哈) 返黎香港之後, 不時都諗下依幾日, 特別係影婚照個日, 好難忘, 仲有多謝honey依幾日咁溫柔, 無鬧過交, 無意見分歧, 甜甜蜜蜜, 一直拖緊我手, 好幸福

台北婚照之旅 DAY 5 - 黃金瀑布 + 黃金博物館 + 九份 + 青桐 + 平溪 + 十分 + 薑母鴨 + 北投倆人旅店

今天可以話係超豐富的一天, 有朋友仔車我地去玩, 可以玩d未玩過既野, 食d地道d既食物, 晚上住的溫泉酒店我恨左好耐架喇, 超正的一天
最特別既係~ 今日係白色情人節呀

我的台灣朋友(左) ~ 小麥 (今天真係辛苦哂你, 仲幫我地車埋行李, 多謝)


渣車渣左差唔多一小時便到黃金瀑布, 好多人都係度影婚紗相架, 但依度超凍羅,勁大風, 有兩架電單車都上黎睇, 我覺得佢地仲凍


再行過d, 就有一間廟宇


廟宇頂上有一專像


去第二個景點時近隔離望陰陽海


之後去黃金博物館, 都好多野睇, 同埋唔悶


四連屋, 即四間屋連埋一齊, 無嘜特別啫


裡面都幾大


出面仲有櫻花添, 好日本呀





跟住友人車我地去九份, 有佢地帶路, 我地真係輕鬆好多
豆腐好好味


肚餓又口痕, 繼續食食食...^^


今日都好多人, lucky既係, 今次第三次黎, 無落雨, 一粒雨都無, 友人都話我地依幾日好好彩, 我地都覺
但honey又講埋依d說話: 因為我黎所以好幸運
講真依幾日都真係順順利利(唯一衰就係酒店掉左我地兩個花球好彩影完相先掉, 唔係殺左佢地呀), 可能唔多唔少佢都有d影響, 話哂今年兔年旺麻>< 朋友仔帶我地食好野,睇下有幾好先 真係有平有靚有正喎, 樣樣都好好味 依個係豬頭皮, 超爽 朋友仔買左一盒請我地食, 好似上環個d粿咁, 我最鐘意韮菜味 沒有下雨的九份景色, 難得一見 朋友仔又帶我地玩依間扮野店, 每人NT$30任玩 衫, 道具任玩任著任影相 朋友仔好似毛主席個仔咁 玩左成個鐘先捨得走, 跟住去食有九份風景睇既芋丸小店, 旅遊書有介紹 勁多人幫襯呀 跟住黎到青桐, 影下那些年風景 行到裡面有一條小橋, 但好多泥巴, 搞到對鞋好dirty 人影我又影, 朋友仔仲係車上播:那些年錯過的大雨...哈哈, 一齊唱 型, 但司機唔型 跟住到平溪, 行左一陣, 食左件好特別既泡菜熱狗 跟住黎到最精彩環節, 仍然無落雨, 我地可以玩天燈喇, 買左四色天燈NT$150 大家跟住買啦, 實有一期中架 大家一齊寫寫寫 店長幫我地四面都影一幅, 哈哈, 準備喇... d字咁肉酸係honey寫架, 咩話生4個!!! 希望我得啦 放喇, 慢慢睇住佢升高, 我地既願望會實現架祝大家白色情人節快樂 好高呀 突然有人吹雞, 原來有火車黎, 嘩嘩嘩, 個個縮哂入去呀, 企哂兩邊等, 好險啫, 得個廿秒時間 跟住見到人放煙花, 我地去左兩年澳門都無放呀, 緊係買一個黎放下, 終於有得放煙花喇, 都幾貴, 依舊野NT$500 由我黎點 之後朋友仔帶我地黎北投酒店附近既薑母鴨, 好似好正咁喎, D枱枱櫈櫈好婑呀, 坐到小學生咁 好平, 四個人食, NT$8XX, 即港幣二百幾蚊, 又飲啤酒, 五個正呀 裡面有好多鴨肉架, 朋友仔就最鐘意食面頭個啲豆皮 甜既台灣啤酒, 啱女仔飲 我地買左D小食同紅酒之後, 朋友仔就送我地上黎依間北投倆人旅店, 要同朋友仔道別喇, 玩得超級開心, 好完滿, 多謝哂 我擇依間都算平, 有優惠添, HKD1066/晚, 最平個間房, 房內有溫泉, 有包自助早餐大堂好時尚好整潔, 連地下樓高3層,我諗成間旅店都係得廿幾間房左右 king size大床, 見到都覺得舒服 係露台個度, 有小溫泉, 同一張枱, 可以嘆下紅酒, 食下小食, 人生一大樂事, honey超開心啦, 佢咁大個仔都未浸過溫泉架, 我地仲早晚浸左兩次添 有溫泉水, 熱水 同埋 冷水, 好舒服呀, 溫泉水溫度啱啱好 房間就細了一點, 我地浸完溫泉仲坐係地下飲住紅酒睇電視 清晨時分, 酒店仲送報紙添, 爽~~ 嚇親故事: 話說我零晨醒左之後, 見到honey背住我睏, 一粒聲都無, 靜到好得人驚, 佢睏覺一定會有鼻鼾架麻, 點都會聽到細細聲既, 係一個超寧靜既房裡面, 佢竟然一粒聲都無, 連呼吸聲都聽唔到, 我仲以為佢可能飲左酒泡溫泉因而... 我即刻摸下佢肚腩睇下佢有無呼吸, 好彩仲有起伏, 嚇得我呀原來後尾問番honey, 佢話泡完溫泉真係好好睏, 無醒過, 鬧鐘响先識醒><

明天係last day了, 真係好唔捨得呀, 期待左半年架麻

台北婚照之旅 DAY 4 - 淡水 + 忠孝復興 + 乾杯 + 師大夜市

太攰了, 睏到12點幾, 搭捷運點半先到淡水, 真係懶洋洋的旅行

淡水車站


公明街直行


好近, 好快就到, 淡水要hea幾粒鐘先出番市區先



最終我有食依個長雪糕, 但唔好食, 超淡, 感覺溝左好多冰咁


一間賣三級野既舖頭, 不怕羞的我一定會去見識一下


要食要食, 我最鐘意食, 野味, 蛋蛋係我至愛, 幾年前黎過我狂食添


阿給, 裡面係粉絲呢, 啲汁好好味


必吃魚丸, 但普通啫



一舊唔知咩石



有皮蛋同雞蛋, 好彩買左各一個啫, 唔啱食羅


裡面都幾靚, 有花



終於黎到景點之一, 台灣朋友仔提議我地去食過下午茶, 3點鐘, 上去!!!!!!!!!!!!!!


吓!!!!!! 行樓梯


終於行到上黎, 無落雨, 緊係坐露台位望下風景啦, 個view唔錯, honey坐到唔捨得走添, 不停話好舒服, 嘆世界咁



見好多人飲依個果汁, 叫左一個, 夠兩個人飲, 味道好正, 有生果係裡面添


再叫一份公司三文治, 兩個人加埋港幣一舊水就嘆左成個鐘, 淡水view, 抵
號外: 厠所一定要去參觀下, 好正, 五星級酒店咁


honey試玩依個



都好, 玩左一次, 有個小奬品, 好叻架喇^^


行出海皮, 雖然個天陰陰地, 但都係一個好好既拍拖聖地, 係香港我都無同honey點行過海皮呢


依個要試好好味,超大粒螺 NT$50/一粒


指定節目之一, 最鐘意睇D奇奇怪怪既野


玩到癲左 好圓好大啊


成日行過都聞到, 終於忍唔住食, 又係好好味


差不多了, 要出番去, 夜晚BOOK左位食飯, 特登係香港打長途上去添架
黎到忠孝復興, 落左少少雨, 買左把遮, 但食完飯又無雨落lu

行去食飯既地方, 會經過hello kitty 主題餐廳, 但我對kitty無嘜感情, d野又貴, 緊係無入去食啦


黎到大安區-乾杯
因為想感受下裡面既氣氛同貪玩, 所以來了


裡面貼滿咀咀相



近d影



honey叫左清酒, 下面黑色盒裡面個d唔係冰水黎, 係清酒黎架, 飲完上面個杯, 可以倒下面個d上去, 正


我叫左啤酒, 大大杯, 食燒肉緊係唔少得啤酒啦


牛舌



豬五花



牛心



帆立貝奶油燒



應該係豬頸肉



牛五花



八點喇, 節目係"飲勝", 大家一齊舉杯飲哂手頭上既野飲, 就會每人送多一杯相同既飲品 (即係買一送一), 送既份量無少到, 係一樣架, 抵呀


等到八點半都未見到有咀咀節目既, 無人玩既, 我就問職員, 佢地話依個節目隨時都有, 只要出聲同佢地講, 結果我地成為第一pair表演人員, 要咀10秒, 送一碟燒肉, 有豬/牛五花擇, 我緊係擇牛啦^^ 送既都唔會縮水, 正常份量, 數過有7塊牛肉呀^^

唔咀唔咀, 我地一咀, 有幾pair都跟住咀


食飽飽, 埋單都$32X 港紙, 食左6碟肉+1份海鮮同每人飲左兩杯drink, 又有得玩, 真係抵玩抵食, 超happy

隔離有間蝦扁食, 台灣地道野, 緊係要試一碗啦, 好味喎


時間尚早, 再行多個夜市先, 師大夜市


之前兩個夜市都想試依個-血米糕, honey食左一口就唔食, 我覺得ok, 但我都係食左幾口


師大都無嘜野行, 賣衫多, 都唔知食嘜, 跟住買左一杯1L 既飲品返酒店LU

第四天完結了, 好唔捨得呀, 仲有兩日就返香港了

明天要九點幾起身兼check-out, 朋友仔黎接我地去玩呀

台北緍照之旅 DAY 3 - 中正紀念堂 + 凱瑟琳擇相 + 拉麵 + 市政府 + 饒河街夜市

12點幾先識醒, 梳洗完食番個lunch先, 黎到中正紀念堂



就係金峰魯肉飯喇, 有blog友介紹依間平靚正,近近地一於食依間


好好生意咁喎, 但等左一陣就入得去食


好似唔洗錢咁,狂點, 樣樣都好平, 真想食多d, 但我胃口仲未回復,留番今晚再食NT$150/兩人份, 咁就一餐平靚正既Lunch喇^^


樣樣都好好味


南門市場, 一個好乾淨既街市


但無買到野


差唔多了, 番返凱瑟琳擇相先, 好緊張呀, 唔知靚唔靚呢~~


一去到, 真係淨係得凱瑟琳係最多人, kiwi三日都係度,真好, 唔洗搵第二個serve我地(我比較鐘意一個到尾),跟住我地坐低等一陣, kiwi又送我地珍珠奶茶


繼昨天收到豪哥既thank you卡, 今日kiwi 又突然俾一份禮物給我, 原來又係豪哥送的,愛死你喇~豪哥
見到依個相架同依3張相, 嘩左一聲, 今次死喇, 要over budget 喇><


kiwi教我地點樣擇相啦, 當時幾pair都係度擇緊相, 擇擇下, 我地由2點幾擇到5點幾, 終於擇好了(packages 42張入相簿,加左20張不入相簿只執相,仲有1張入相簿係送既)

以為擇完相, 點知仲要擇好多佢附送既禮物, 結果又擇左一個鐘, 擇相簿同相簿附送既相片


擇相架同附送既相片


跟住擇油畫, 仲要擇埋框, 越擇越開心


擇完都差唔多七點, 27/3會有第一次執相既效果, 俾完錢諗住走, 點知佢地真係作出承諾, 在婚展下訂時說請我們吃飯, 真的請我們吃



既然佢咁客氣, 我地緊係唔同佢客氣啦, 叫左野飲 + 兩碗拉麵 + 一客炸豆腐, 但個老闆仲係咁介紹其他野俾我地, 但又唔好去得咁盡, 依餐都食左五百幾蚊台幣呀,哈哈






幾好味喎



跟住就正式開始我地既台北行程喇, 第一站市政府



好得意呀


誠品, 但我地無行, 無嘜興趣


101, 即刻諗起琴日影相, 好想再影多次, haha


行完仲好早, 搭的士去饒河街夜市, 同士林好唔同, 我覺得依個夜市先正宗麻, 好有特色

胡椒餅必食啦, 勁多人排隊


超熱


正! 好味!!!


柳燈汁


抵食生蠔, 叫一份都等左好耐呀, NT100/份, 有7隻呀


試下NO.1 先, 依個男仔好有禮貌到我以為佢係日本人呀



蛋真係好滑,好味!!!


叫左一份兩個人食, 排骨, 又係好味之作


因為食左拉麵, 已經盡量食, 超飽, 賣仙草叔叔教我地教公車返酒店, 捷運太遠了, 坐左半個鐘就到, 好彩honey認得GEM 男裝公司, 我地可以沿路拍住拖行番酒店喇


哂一哂凱瑟琳送既禮物先

台北緍照之旅 DAY 2 - 凱瑟琳拍緍照 + 士林夜市

依日等左好耐,差唔多半年喇,要好好享受依一日先


一朝早唔知做咩,見honey對我冷冷淡淡咁(可能佢未睏醒掛),我有d唔開心,食左少少野就出發


之後可能honey食飽左,個人醒左,精神番哂,對我好番d,我先開心番,買番杯奶茶醒醒神先,勁唔好飲


上到去已經有幾pair人化緊妝,換左衫,跟住走到我地私人存放室,已經掛哂我地d衫係度喇

小插曲:琴晚攝影師睇我擇咩衫個時, 發現我擇個件室內白紗都唔同我擇個件, 佢地十點收工, 淨番kiwi同有一/兩個同事係度, 佢地就即刻打電話俾服裝小姐問,但佢都唔記得,我話我有影相架,佢地叫我聽日攞俾佢地睇, 同埋可能相片出錯,聽日件衫會啱番, 但今日我上到黎, 件衫都係唔同,我就俾張試衫相佢地睇(其實擇左五件衫, 我只影左依件白紗,估唔到竟然錯依件,都唔知好彩定唔好彩),一睇就知係邊件啦,但門市一點先開門, 佢地話叫我著住件錯既影住先, 之後再攞番我擇既白紗即場改即場再影,其實佢錯個件我都覺得幾靚,我化完妝, 佢地已經攞番啱個件俾我喇,即刻改,我就著住件錯既影住相先, 結果我有6套衫呀
要讚既係凱瑟琳態度好好, 即刻諗辦法解決問題, 多出一件衫都照俾我影

生氣: 芸珍竟然話台灣好少著girdle影相, 話著左仲肥喎, 我仲買左件$360既girdle去添, 早知唔洗買啦



佢地包既午餐, 超多,我束住腰都好努力食, 但我地都係食唔哂,仲有銅鑼燒, 正! 上到車每人有一支水,仲有飲管,好細心喎


佢地既行李, 一個超大既袋就放左我4套衫, 仲有飾物,仲有honey既衫同鞋,跟住擺上車頂


依架7人車,但都細架,我著件誇d既晚裝, 我已經轉唔到身,司機好好人,做埋凱瑟琳員工呀,變流動換衣間都係佢一手包辦



先係化妝室個層影一影新景,但影左兩張俾人趕走左(依件白紗就係錯個件喇,心型胸)
之後又上7樓影,又落番6樓再影,又影下相中相


必影既景 (依件先係我擇個件,tubetop款腰間有好多閃石)





影到差唔多1點先出去拍外景,車行五分鐘, 停低一塊草地,有一棵樹,影幾張


之後去北投, 中途停低,變身變妝影, 化妝師-芸珍


助手-阿權



攝影師-豪哥(有點似我鄰居)





去陽明山個時, 中途攝影師落左兩次車, 原來係幫我地搵櫻花(我話見到就影啦), 佢咁上心, 我們真係好感動啊


依件係自已帶去既,背心都係自己既,豪哥好好人, 唔知係邊度搵到依條咁特別既tie, 戴左即刻型哂
今日honey不在狀態, 完全唔知自已做嘜, 激死豪哥了



101景一定要影啦, 落車時見到對面有一隊拍攝隊係度拍電視劇, 但我地無人識得個D名星仔


終於影完喇, 返到凱瑟琳就已經9點了,租左8個鐘車, 要即刻俾錢的, KIWI就帶番我地今朝化妝度換番衫, 換衫前我都自拍左幾張^^
芸珍好好人, 因為時間都仲好早, 可以去夜市行下, 佢就幫我紮起D頭髮, 紮得好好睇,我仲除CON戴番眼鏡,因為未落妝, 變到隻眼化得好誇張, honey話我似麻辣教師呀


跟住返番凱瑟琳諗住清埋條尾數, 佢話聽日黎擇相先俾啦, 睇下到時洗唔洗加相,
跟住俾左個信封我地, 係攝影師豪哥俾我地架, 原來係thank you卡, 仲即時print左我地張相, 我同honey真係好開心呀,成日影既相我一張都無睇過, 竟然即刻有實物拎番屋企, 我一定會好好保存架, 謝謝你^^


影完相, 成身輕哂, 都唔係想像中咁辛苦啫,我覺得好好玩呀, 可以再玩多次架, 但honey就...


後記: 整日拍攝過程都好輕鬆,好開心,攝影師超好笑, 不要我男朋友入鏡既時候就會說:老公,bye~~ 又成日用廣東話講:笑啦, 露齒啦, 雖然相片無大師級既風範, 但佢影到我要既開心,溫情同浪漫, 所以豪哥你好棒啊!!!

近近地, 緊係黎台灣點都要去既士林食下野啦, 但我俾d衫紮住我條腰好耐, 搞到我無嘜胃口添, 但都照食,嘻嘻...




新面貌喎



不過都唔似夜市,似街市個d食堂咁,唔係咁鐘意
見到蚵仔煎,就坐底試下先,又幾好味喎,脆脆地,裡面係薯粉做既,我幾鐘意食



再叫多碗肉羹, 真係唔錯喎



跟住食鐵板燒, 叫左一份菜, 佢加左牛油, 好甜呀


炒雞肉


洋蔥炒雞肉, 偏喊左少少, 但都good既


大腸包小腸



真係唔係幾食得落, 食左好少野咋, 聽日再繼續食食食

見到好多小時玩意


釣蝦 >< 釣完可以即刻燒黎食, 但我無玩


依間野好多人排隊呀,但決定留番最後一日先食, 我驚食完, 依幾日都要睏係酒店呀


食少少炸野先, 炸鮮奶


honey就好鐘情依d


羊肉串,嗯,好好味


之後買左杯果汁下下火就回酒店大清潔喇, 就係落妝同沖幾次涼羅, 仲要幫honey落埋, 搞左兩個鐘先睏得

台北婚照之旅 DAY 1 - 機場 + 永康街 + 瑟凱琳 + GEM男裝禮服

之前係百年找換店唱錢唱左幾萬蚊台幣,當時對@3.69 但影完相都即刻無左一大半


得個幾鐘頭機,擇左福祿壽黎睇,笑下先


因為聽日要影相,又食左少少早餐,同埋飛機餐好難食,食左兩啖就無食lu

酒店未check得in, 先放低行李, 即搭的士去鼎泰豐, 諗住去攞飛先,之後先番返黎食, 點知話等十分鐘左右就入得

依個時間無嘜人等,之後走時經過見到超多人等, 好彩
等既期間叫我地點住野食先


四季豆超好味,但係凍既


醉雞一般,香港老尖個間好味好多

小籠包,普通, 裡面汁多,honey話 x翠拉麵好味d喎


之後過對面黎到信遠齌,買左一小盒仔滷味就收我150台幣,都幾貴喎



再行番黎永康街食野先


幾出名既度小月,有部電視機仔播既蔡san,蔡san你好串喎


依個師夫好勁呀


好清新既沙律


依碗麵得係無得頂,好好味


跟住黎度我指定既天津蔥抓餅,估佢唔到, 超多人排隊, 我地等左差唔多四個字先到我地


阿姐對手不停反碟(反餅先啱),反下反下,反埋隔離個d過去再反,好似玩緊雜耍呀


加蛋,好味


因為知道永康街離捷運好遠,電話又無電,想google都唔得, 結果又搭的士返酒店攞架餐(即係nu bra,鞋個d)
之前係google行過一次, 所以識行,酒店離凱瑟琳超近,5分鐘就到,真係好大間,全層都係佢地呢

入到去己經見到kiwi, 佢就指示我地去試男裝先,行左十分鐘,黎到一間叫GEM,入到去拍烏蠅既, 點知一上樓上,原來已經有好多人試緊衫,好似秘密機地咁,好快手擇左一黑一白既燕尾服,因為我千叮萬囑叫honey帶多套西裝西褲黎(平口西裝+令面西褲),咁佢就有3套衫喇,再除件西裝影, 咁佢就有4款造型喇



試完後又回到凱瑟琳,先上兩層(老人家頂唔順)試緍紗,佢地已經攞左我之前留個幾件出黎俾我試,但我留左6件,最終只有4件俾到我試,最後擇左兩件白紗,
一件拍室內,一件拍外景

之後落一層,選晚裝,試左好多件,最後擇左綠色,紅色同埋粉紅色


這座大廈,是在凱瑟琳隔離, 明天早上8點就去依度6樓化妝影相, 返去check in先,再等攝影師
中途要等攝影師返黎溝通, 等到十點佢先出現 好彩我之前print哂d野俾佢睇,同埋寫埋我想要d咩,佢話拎返去睇(咁你返去慢慢睇), 我地歸酒店休息先,仲有好多野做呀(脫毛...)
入到黎酒店房,感覺ok呀,平價酒店都算優質喇,麻雀雖小 五臟俱全,仲有domdom送添,但唔識個牌子
仲有仲有, 最意想不到既係,酒店職員同我講佢地早餐時間係6-10am, 下下下,我地問左幾次係咪免費架,簡直係意外驚喜呀

台北婚照之旅 - 前奏

台灣 SK Pre-Wedding
Date: 10/3/13(日)~15/3/13(五)

地點:
台北

住宿:
酒店4晚 (10/3~13/3) 百利飯店(含早餐)
酒店1晚 (14/3) 立德北投倆人旅店(含早餐)

機票-香港航空:
香港到桃園機場 12:05-13:45
桃園機場到香港 20:25-22:20

攝影行程時間安排:
北投 --> 陽明山 --> 野柳 --> 101
3月 10日晚上 6點 到我們公司來量西服
3月 10日晚上 7:30點 到我們公司來挑選衣服
3月 10日晚上 9點 到我們公司跟攝影師溝通
3月 11 日當天拍照一整天
3 月12 日 下午2點 來我們公司來挑選你們的照片
你們的攝影師是~~~ 豪哥 安排的造型師是~~~ 芸珍

台北6日5夜行程
10-MAR(日)
10:00機場check-in
12:05-13:45 到桃園機場
14:45 去大哥大買完上網電話卡後乘巴士到台北車站轉的士到百利飯店(長榮可到雙連)
16:00 放行李到酒店
16:00-18:00 永康總店(鼎泰豐/燻雞/度小月/天津蔥抓餅/買早餐) 鼎泰豐無得訂位
18:00 到凱瑟琳試男裝
19:00 回飯店check-in
19:30 到凱瑟琳試婚紗及晚裝
21:30 跟攝影師豪哥溝通
22:30 回飯店執野及休息

11-MAR(一)

08:00 到凱瑟琳進行一整天拍攝

21:30士林夜市掃街回飯店(劍潭站)



12-MAR(二)

12:00 中正紀念堂(金峰魯肉飯)

14:00 到凱瑟琳選照片

19:00 凱瑟琳請食晚飯

21:00 市政府+新光三越

21:30 乘的士到饒河夜市(後山埤站)

23:00 乘公車63號回飯店



13-MAR(三)

13:30 淡水行街,淡水紅樓下午茶

18:00 忠孝復興

19:00 乾杯 大安區本店(訂左七點)

21:30 師大夜市掃街回飯店











14-MAR(四)-朋友車我地去玩

10:00 百利飯店check-out

11:00 出發到黃金瀑布+拍照

11:30 黃金博物館+參觀

12:30 出發至九份老街

15:30 青桐/平溪老街/十分放天燈放煙花

20:00 吃薑母鴨

21:00 北投倆人旅店check-in/泡溫泉



15-MAR(五)

09:00 吃酒店早餐

11:00 執行李/泡溫泉

12:00 北投倆人旅店check-out

13:00 到台北車站寄存行李/買車飛

13:30 西門町

17:18 出發去機場(高鐵到桃園機場)

18:25 到機場check-in

20:25-22:20到香港

龍鳳鈪

三日後就去台灣影婚紗相喇, 心想快d去, 但又唔想過程過得太快 今日整完指甲,俾honey提一提, 就左去大福度睇龍鳳鈪, 依兩對係嫲嫲送的, 唔知點解, 入到去好快擇左兩對, 一對光面, 一對磨沙面, 好合眼緣, 可能係嫲嫲幫我地擇好左, 但神奇既係, 個sales個中文名係同嫲嫲一樣架, 仲有最神奇既係兩對龍鳳鈪, 每對重量都係一樣, 之前我都睇左幾次, 都搵唔到一對一樣重, 但依兩對都係一樣重架, 其實一入到去就攞左依兩對黎睇, 無擇過其他款, 無睇過重量, 嘩, 好激呀, 多謝嫲嫲 今日金價$16380/両 ~ 貴 就係依兩對大細孖

SK 台灣 Pre-wedding倒數

仲有幾日就出發喇, 超緊張超興奮呀


依個禮拜都好忙呀,仲有執行李同整埋個花球
星期日 染頭髮
星期一 陪honey去買背心同剪頭髮
星期二 約左朋友食飯
星期三 去沙田整指甲
星期四 去沙田整腳甲
星期五 搞埋公司d野, 安心放假
星期六 放工要去做 facial 做背 買禮物送俾台灣朋友
星期日 出發喇
我相信到bigday前一/兩個禮拜會俾pre-wedding更忙呢, 好似做show咁呀, 希望影相個日, 唔好落雨, thank u