去honey鄉下"泉州"

24/12~30/12 同honey&佢媽媽去左佢鄉下, 係深圳搭左十個鐘頭車先到, 鄉下都幾得意, 呼吸下新鮮空氣, 食d健康既食物, 最鐘意今朝有honey嫲嫲煲既蕃薯粥, d 蕃薯金黃色, 勁甜, 又健康又好味,但佢地幾日淨係講火星話,悶親我羅, 我又唔識 其實我都搞唔清, 我去左福建定廈門, 好亂亂呀~~ 最意外既係佢嫲嫲話honey結婚要返黎請飲, 要擺10圍每圍$1500人仔, 嘩, 即係要$15000人仔, 又要洗多筆>< 我諗結婚要請兩個禮拜假, 係香港擺完酒, 之後去honey鄉下擺, 之後去埋honeymoon, 一獲過, 嘻嘻

決定婚宴場地 - 逸東酒店翡翠廳

逸東俾左入場卷俾我地, 今日終於落左訂喇, 做左一樣大project BIG DAY: 2014年9月28日(日) 一去到會場即刻搵逸東係邊, 搵番琴日個姐姐仔傾, 不過太早都唔會傾到D咩優惠樣樣都話無, 依家傾到有兩款席前小食及60杯 fruit punch, 免所有開瓶費,無lu, 當日會場抽獎有$40 7仔現金卷, 但前面個個抽都係一樣=_= 跟住行過iswear, 差d join埋佢個當日攝影, 好彩無join到, 佢萬一蚊左右,2p1v, 送3段片當晚播,仲有當晚派相, 佢d thank you卡可以印我地將相落去, 超吸引羅, 但坐低睇d相同片, 我同honey真係睏著, 走都走唔切... 今次婚展真係好認真睇, 所以超攰, 其他project 再慢慢擇下先

婚宴場地睇場(4) - 再睇逸東酒店 (Eaton Hotel)

今日預約左2-4點去逸東睇真d個場, 上次只睇到金鑽廳, 今次終於睇到Jade廳了, 不過衰在佢兩個場相距太近, 我驚d賓客去錯左人地個場, Jade廳要行一條走廊入去既, 我覺得幾滿意既, 送客可以企條走廊度...



依個廳最多擺到18圍, 仲可以放到十枱麻雀, 正! 啱哂我老豆d 朋友, 初頭幾驚唔夠
好, 去片

Receiption, 要搵人整靚佢先,我要D賓客一出電梯就望到我地, 廢事入錯房啦



依條走廊有私人空間,又要將佢扮靚靚先,送客都係依度架喇



裡面個場,今晚有function, 開始佈置緊



一開始為左d麻雀而擔心,因為我老豆要多d麻雀枱俾佢d 朋友打牌, 而家可以放到十枱麻雀,真係一天都光哂^^


個台,全紅色,酒店包左普通backdrop, 但我都要出去搵,加番多d野上去,最緊要有個大既囍字係我最想要架


介紹一下超細既新娘房,真係細到轉身都有困難







新整既水晶燈



有3隻顏色,幾靚


暫時係依個樣, 到時隻顏色會唔會轉呢,依隻色令到個場醒神好多喎

我的大妗姐

今日同honey講下搵邊間公司做當日拍攝, 我話搵d會係斟茶個時會講埋大妗姐講既野個間啦, 跟住佢話緊係要另外請番個大妗姐啦, 好多野要佢搞架~ 我一直都無諗過自已會有大妗姐跟身, 好似以前背住個新娘出橋車咁, 突然覺得好傳統好懷舊呀, 原來honey好錫我架, 仲以為佢會依樣唔請個樣唔用咁添, 好感動呀

超有效率日

今日好勁呀, 做左好多野, 因為係公司實在太得閒喇^^ 1. 問左逸東d落訂資料, hold住左個期, 約左15/12下午3點睇場, 仲叫佢俾埋16/12既婚展既入場卷我添 但問左逸訂金只可以分兩期俾, 只達兩期目標, 都好呀, 都有$600呀 2. 近日收到恒生卡發黎既冬日二重賞, 三期達標有$900 cash dollars架, 反正酒店都要俾錢落訂, 攞番d cash dollars都好呀, 我已經打左五/六個電話去問清楚有關詳情, 原來唔係人人都有收到架^^ 3. 諗都唔諗就入左$300試妝錢俾MUA Kelly同我hold住個期, 佢價錢都ok包好多野, 我唔洗再煩再另外洗錢, 希望試妝時令我滿意啦 我發覺我好有資格係秘書...可能依個係我本身既性格啦,哈哈^^ 但諗諗下會唔會太快決定哂所有野呢~~

擇日

今天去左大埔擇日, 間野超熱, 又唔開冷氣, FANS又得一把, 但吹唔到我地, 早知冬天先黎啦

香港婚宴博覽2012

本身都唔諗住去, 上次都攞左好多資料,但有免費入場卷緊係去啦(多謝mavis) 會展行得舒服過九展好多喇, 雖然都係咁多人, 但場地大好多 我地行行下又去凱瑟琳望望, 又見到上次SALE我地既KIWI 喇, 佢都認得我地, 傾左幾句就繼續行, 行到去逸東, 忍唔住去望下, honey又問下2014價錢幾時出, 但竟然答我地話"出左", 咩話,一個月前都話下年先出, 咁快就出左, 咁我地即刻再問下min chr, 嘩, 又貴左萬幾蚊, 仲要擇B餐以上先得, 好貴呀, 貴左咁多, 要再計過budget 喇, 再繼續儲錢, 今日又攞左一大堆野, 返屋企慢慢睇, 好多項目都有d眉目了

婚宴場地睇場(3) - 日航酒店

今日日航酒店OPENDAY, 約埋BOBO同佢未來老公仔一齊去睇場 個場好靚好吸引,菜單都幾滿意,又唔會太貴,但得一個大場吸引到我地,MIN$220,000 可以擺三十圍,如果MIN無咁高或者我有廿幾圍,我會擇日航,場內仲有LIVE BAND, 拉哂我最鐘意既迪迪尼歌, 有美女與野獸同阿拉丁,仲有那些年, 好正呀

婚宴場地睇場(2) - 柏寧酒店

見到OPENDAY就上去睇下啦, 價錢包埋酒水, 都有D興趣, 上到去最高-27樓宴會廰, 27樓都唔係好高啫,以為個view好正,but... 真係幾失望,"超"長方形廰,但個台就放係中間, 仲有柱,超唔得羅,海景得一半, 另一半係維景,所以個場唔鐘意,但價錢抵都有得諗 我地睇價錢, 最平都要一萬一圍, 但有翅 (而家好多酒店都無架喇), 跟住個sales姐姐話min要$220,000, 咩話22萬, 對於我地依d 16-18圍既, 即刻諗都唔洗諗啦>< 走左之後honey同我講番, 佢聽到另一pair同sales姐姐講, 你地個min charges咁高, d meau最貴都係去到$14000, 我點都砌唔到22萬啦, 跟住個姐姐就好細聲答佢, honey聽唔到 lu 總結有柱,個場超長,中間整個台, 左右兩邊d賓客淨係睇到側面, 只有前面(大約六枱)睇到正面, 超搞笑羅, min超貴, 跟本就係俾擺廿幾圍以上的新人 唯有繼續睇場啦 有點老土的紅底金字 右手邊, 仲有新娘房, 超細, 無獨立洗手間 左手邊係海景,啱啱有人食緊野, 所以間開左 黎到緊係要試下佢d食物質數如何,都幾好味, service都ok

2012年~2013年的婚展時間表

日期 2012年9月22 - 23日 展覽名稱 第十屆婚展會2012 地點 九龍灣國際展貿中心匯星及展貿廳 1,2 日期 2012年11月2 - 4日 展覽名稱 香港婚紗暨結婚博覽2012 地點 香港會議展覽中心展覽館 5FG 日期 2012年11月2 - 4日 展覽名稱 香港婚宴博覽2012 地點 香港會議展覽中心展覽館 5DE 日期 2013年3月15 - 17日 展覽名稱 香港婚紗暨海外婚禮博覽2013 地點 香港會議展覽中心展覽館 3BC 日期 2013年3月15 - 17日 展覽名稱 香港婚宴暨世界名酒博覽2013 地點 香港會議展覽中心展覽館 3DE 日期 2013年4月27 - 28日 展覽名稱 第十一屆婚展會2013 地點 九龍灣國際展貿中心匯星及展貿廳 1,2 日期 2013年7月12 - 14日 展覽名稱 香港婚紗暨結婚用品博覽2013 地點 香港會議展覽中心展覽館 5FG 日期 2013年7月12 - 14日 展覽名稱 香港婚宴暨結婚服務博覽2013 地點 香港會議展覽中心展覽館 5DE 日期 2013年9月21 - 22日 展覽名稱 第十二屆婚展會2013 地點 九龍灣國際展貿中心匯星及展貿廳 1,2 日期 2013年11月1 - 3日 展覽名稱 香港婚紗暨結婚博覽2013 地點 香港會議展覽中心展覽館 5FG 日期 2013年11月1 - 3日 展覽名稱 香港婚宴博覽2013 地點 香港會議展覽中心展覽館 5DE

confirm pre-wedding 日期

今日收到凱瑟琳 kiwi嫻葳 confirm 11/3/2012影相, 攝影師係豪哥, 都唔理放唔放到假, 話之佢, haha, 仲俾埋個時間表同貼心小叮嚀我地添

3月 10 日下午 2點 到我們公司來挑選衣服
3月 10 日晚上 8點 到我們公司跟攝影師溝通

3月 11 日 當天拍照一整天

3 月 12 日下午2點 來我們公司來挑選你們的照片

你們的攝影師是~~~ 豪哥


豪哥~~ 我將我地交係你手, 影靚d呀

一週年紀念

週年紀念前三個禮拜,就諗食咩好,要食西野,係團購睇到個二人set, 問左honey佢話好之後就買(其實之前都中伏過好多次)不過見二百幾蚊就試下啦,都算係西野啦~ 地點係老籣,個日去到,星期一真係無嘜人喎,訂左枱有個幾好坐既sofa卡位俾我地,環境暗暗地,星期五/六會有band,今日無,但有好多情歌,啱哂我地,都算有情調呀~ 食完之後今次真係無中伏喇, 大讚五粒星, 有六個course, 兩杯酒, 靚靚一set餐具, 有情調,仲要係老籣,兩個人埋單連加一都只係$280有找,d野食仲要係goodgood添,有酒有水牛芝士有扒食仲想點 $248 Graffiti 二人意式晚餐, 豪歎意大利水牛芝士火腿, 辣味香腸薄餅, 黑椒牛柳薯粒,海鮮燴飯等美食, 兼享餐酒, 啤酒及每晚駐場樂隊伴奏 (先黎兩杯白酒) (水牛芝士,第一次食,一d都唔溜,感覺好特別,食到依樣,我同honey都嗌飽喇,但仲有以下三個course) (我既至愛,辣肉腸,好好味呀,份量都多架) (honey話依塊靚扒黎架,依塊扒出面成本都要幾十蚊啦,真係好好味呀) (依個海鮮燴飯個樣就衰d,但好香好好味,最終成個餐我地食哂,勁呀)

凱瑟琳婚妙攝影

其實都無諗過咁早plan定任何野,不過見到九龍灣有婚展就去睇下,我同honey都係入去睇下,攞下d資料睇下,有咩都係下年先決定,入到去婚展真係好暈, d人係咁同你講野,又不停派傳單俾你睇,去到影台灣婚紗展場既時候都唔知個度全部都係sales台灣攝影,我地仲覺得奇怪,點解依度咁多人講國語,哈哈 原本都諗住淨係o係香港影,慳番d錢,但香港又無嘜景影,行過凱瑟琳,真係想去坐底聽下佢個package,雖然都無心join,之前網上睇過,勁多人讚 依間係我唯一自動走埋去等人sales我既,佢都好落力,跟住睇下d相簿啦,睇睇下d相我好鐘意,有哂我鐘意既場景,但個時都係得個恨字,因為又要機票又要酒店,加加埋埋都幾貴,不過佢全部工作人員都係台灣,我地唔洗包埋佢地既機票同酒店,依度都可以慳番d,sales講左好耐,我地都諗住走,但honey已經見到我流哂口水,鐘意既表情擺哂係塊面度,突然殺出個經理,話會送多我六組相,又送魔天輪,掌中本同簽名冊,放大畫框都由24吋放到30吋, 經理又話會俾d新衫我擇,同埋佢地d衫無分區,可以任擇,咁真係幾吸引,我將個話事權俾左honey,但佢竟然即刻落訂,我真係唔敢相信,我竟然可以去海外影婚紗相,我真係好開心呀,而家暫時3月去影,要快d修身喇 我地join左依個plan

婚宴場地睇場(1) - 逸東酒店 (Eaton Hotel)

之前睇左人地個blog睇左好多場地,最終都係擇逸東酒店擺,我都睇過逸東既網頁,見佢依個價錢黎講,都算係酒店之中,屬平價系列,地點又ok

睇睇下生活易得知2/9 逸東有open day, 即刻同honey去睇下啦,嘩! 金鑽廰要min charge HKD180,000




起碼要擺廿圍以上先有依個數, 但個場好靚呀, 又有條長樓梯,新娘子換完衫就可以係個度落黎,係上面望落黎既感覺, 真係覺得自己好似公主,下面有王子等你, 正!!!

但我地都係諗住十數圍,所以都考慮唔到依個場, sales姐姐就介紹左另一個場俾我地,係翡翠廰,佢話個廰裝修過,已經加左水晶燈係上面,依個平d min charge HKD130,000



(依張相未加既, 咁加左水晶燈真係靚好多, 雖然同金鑽廰差好遠,但價錢黎講算係咁啦)
sales姐姐話而家包埋backdrop,又可以慳一樣喇
其實都确實會請幾多人,如果BOOK左翡翠廰,但最終個價錢去到HKD180,000,我會好後悔當初唔擇金鑽廰架

但而家都唔洗決定住, 下年年頭先再諗啦

我同honey都鐘意係酒店擺酒,始終個服務,排頭都好d, 同埋貪佢有酒店房包埋,擺完酒可以即刻去抖一晚

第一天

開始留意結婚資訊,真係好多野睇呀,自己又好多野都唔知唔識=_=''' 網睇到依條裙,我好鐘意依個style呀 ^^